本文重點
乜嘢形狀可以密鋪平面呢？呢個基本上只係一個小學常識問題，不過，咁簡單嘅事原來關乎到太陽能科技發展。陽光能源（00757）執行董事兼總裁譚文華就話，公司早前就因為掌握新一代單晶矽方塊切割嘅技術，能夠開發更具能源效益嘅太陽能電池板，直接提升競爭力！
方形單晶矽片增效益
譚總同絲絲講，陽能係中國首家公司成功掌握新一代單晶矽片切割技術，以前單晶矽受到矽錠形狀及技術所限，只能夠切割成八角形，無法密鋪平面，而新技術就可以生產出正方形嘅單晶矽片，提升太陽能電池板嘅效益，夠晒環保。
講開陽能，集團上半年曾因多晶矽價格下跌要作存貨撇減，不過身為執行長特別助理嘅譚鑫解釋，話集團始終係從事單晶矽片嘅中下游業務，所以上游原料價格變動對集團影響有限。唔講唔知，譚鑫原來係譚總嘅乖仔，睇嚟譚總早已訓練阿仔一齊參與公司未來嘅業務發展。
余絲韻