翻查「雷教父」嘅資料，佢畢業於英國倫敦及政治經濟學院，獲經濟學士學位及人事管理專業文憑，一九八五年加入施羅德基金公司擔任投資主管、執行董事及副主席等重要職位，佢更係最早到內地發展嘅「明星級」基金經理，威水史簡直不能盡錄。談到孖妹心中嘅「難題」時，雷賢達坦言：「人雖然性本善良，但都係要用心去學習如何做人，當中奧妙之處與做投資無大分別，同樣需要智慧、經驗、膽識和眼光。」

睇透市況靠個人修為

高妹：對於學習天分較低嘅人嚟講，智慧就如天上嘅月亮，永遠都摘唔到。我哋應該如何增進智慧，從而學懂做人以及投資呢？

雷：讀書叻嘅人，唔一定擁有智慧，亦唔代表識去做人。我指嘅智慧係個人對事物嘅領悟力和敏感度。喺金融市場上，投資者要有能力去分析股市走勢、股票過分升跌嘅原因、市場消息真偽等變數，而書本上嘅知識只係輔助你去分辨是非黑白，但最重要都係靠個人修為，即係正確人生觀和思維方法。凡事盡可能用客觀態度去面對，心中問題自然通透，舉個例子，面對去年十月恒指跌到10,676點低位，其他人都好驚而你又唔驚時，冷靜就已經係一種智慧。

莉莉：講到經驗，我估好多股友都係輸錢經驗多過贏錢經驗。

雷：每個人一生中總會有犯錯，我20幾歲初入行時，一樣唔知乜嘢叫經濟循環、股票波幅，唔通我每次去幫客戶做投資時就唔緊張？但大家要明白金融市場有循環，投資者贏錢時容易得意忘形，投資態度開始變本加厲，最後由贏家變輸家。去年金融海嘯嘅發生，就係有啲人為咗利益而不擇手段，終把積累多年嘅問題爆發出來。

盛極必衰 否極泰來

高妹：你嘅意思係指「失敗乃成功之母」？

雷：無錯，失敗往往係成功嘅開始。我覺得年輕人喺人生上抑或投資上，愈早感受失敗和挫折愈好，因為有過心靈上或物質上嘅損失，切膚之痛會令人發現自己嘅不足，繼而愈早去改過。坦白講，股市有升有跌，一生人有幾十年時間去做投資，當中一定會有風浪；做人亦有三衰六旺，有高潮亦有低潮，最重要係大家明白任何事物都係「盛極必衰，否極泰來」。

高妹：我同莉莉都係心口掛個「勇」字就衝入股市，不過唔知係咪膽識唔夠，所以輸錢居多？

雷：我好認同「股神」巴菲特嘅講法：「在別人恐慌時貪婪。」不過，喺今次金融海嘯中，能夠喺低位時大手買入股票嘅人唔多，就係因為投資者嘅膽識和信心唔夠。當大市唔正常咁狂升時，投資者應該要知驚，相反大跌市時就要鎮定，睇清楚周圍情況。

切忌急進 勇謀兼備

莉莉：咁乜嘢叫睇清楚情況呀？

雷：當你有10萬元時，唔係將10萬元全部投進股市，就代表你有膽識，因為膽識係需要知識和信心去支持。當投資者對一間公司嘅背景、業務、管理等範圍都有深入研究和了解，自然更有膽識買入該公司嘅股票。所以睇清楚環境即係要有勇有謀，有時仲要勇於承認自己嘅錯誤投資決定。

莉莉：爸爸媽媽成日教我要帶眼識人，特別係識男朋友，呢種「眼光」又係咪你所講嘅「眼光」呢？

雷：差唔多啦。好嘅投資眼光就係唔會因為「過早入貨、過遲出貨」而引致投資損失。培養個人長遠眼光嘅首要條件，就係投資態度不能急進，當一個人處事太過進取時，過程中會容易忘記負擔和責任心，繼而忘記考慮後果。另外，投資眼光又涉及信任，當你畀一隻股票「呃過錢」時，就要記得唔好畀佢呃你第二次。只要大家記住急進和上進只是一線之差，睇通市場變化再結合個人客觀投資看法，就能穩操勝算。

知進知退 量力而為

高妹：你喺金融市場打滾三十多年，有乜嘢投資心得同股友分享？

雷：做人與做投資嘅道理一樣，思考事情時不能過於單一。每個人天生都有欲望，但唔可以為求個人利益而傷及他人，要知道當你追求極大回報時，風險亦會愈大，所以我哋必須學習將欲望變成正面，賺到錢時要懂得為家人、社會去付出。世界和經濟狀況變化萬千，大家一定要量力而為，不能過於妄自菲薄，適當時候要知進亦要知退。

無錯！投資要講判斷力，好似呢排抽新股，唔係個個股友都賺到錢。近期上市嘅新股表現參差，個別新股首日掛牌曾升近倍，但部分新股跌穿招股價後更繼續尋底。今期《東方產經》網上民調就問大家：「今輪新股潮你有否獲利？」截至上周末晚上6時，40.1%股友話有賺，10.7%人話無賺，至於要蝕錢及無抽新股嘅分別有25.4%及23.8%。投資道路漫長，新股永遠抽唔完，錢亦永遠賺唔完，正所謂學海無涯，學做人與學投資都係一輩子嘅事，當中有晴天也有雨天，大家繼續努力學習啦！

莉莉、高妹

若有料報畀高妹同莉莉或有嘢問，可電郵money.biz@opg.com.hk