限薪防危機唔合理

講番正題，最近金管局出咗份《穩健的薪酬制度指引》諮詢銀行界意見，歐美政府推出嘅限制花紅政策或會「燒」到香港。改變花紅制度甚至限制銀行派發花紅，係咪可以防止金融危機再次發生？之前香港好多「亡命小巴」意外，想改善司機超速惡習，有人會建議安裝車速監察器、加強執法、提高懲罰等，但冇人話要限制司機薪酬，等佢減低走多兩轉嘅誘因。點解對於投資銀行會諗到限制薪酬呢？如發現不法或操守有問題，政府應該作出監管，但管人哋收入幾多，就有啲唔合理。

無可否認，「花紅原動力」係投行嘅重要文化。有投行已預告今年「零花紅」，員工士氣低落，有啲甚至擺明搵工，就算外表若無其事，心態都係「既然無錢分，為乜咁搏？」喺呢個心態下，交易員炒得無咁狠，會唔會成為股市再上嘅障礙就要慢慢觀察，但唔好忘記，巨額花紅帶來嘅消費力不容忽視。

講番個市，港股上周突如其來大跌幾日，跌到50天平均線先有支持，之後又迅速反彈，重上20天平均線。

50天線反彈又靈驗

睇走勢圖發現，恒指自今年三月重上50天平均線後，分別喺七月、九月及十月初都試過稍稍跌穿50天平均線後「V彈」仲屢創新高，當時14天RSI都係跌穿50點無耐就反彈，最近恒指14天RSI又係跌到50後回升，今次個市又會係點呢？

如果跟住我成日講嘅「50天平均線出入市法」，今年投資成績應該唔錯，雖然之前幾次跌落50天平均線會被震走，但如果有照足訊號上番車，應該唔會蝕底好多。

（大健）