花旗魚缸急挫，除了因為經濟數據較預期差，CIT申請破產保護的可能性大增，花旗集團面臨資產減值風險，預期本季度底需就遞延稅項資產減值約100億美元，華爾街擔心金融機構再面臨嚴峻考驗，消息拖累金融股沽壓沉重。至於本地魚缸今日恐怕亦難逃一跌，睇怕都要再下試上周四低位，呢個星期更有機會跌穿二萬一水平。

成也美元敗也美元

不過古勝認為，在市場資金仍相當充裕下，本地魚缸大幅插水的機會唔大，呢個月都係上落市居多，反而花旗魚缸走勢較為疲弱，若然美元反彈持續，花旗魚缸有可能再下試更低水平。一句講晒，近日各地魚缸走勢，跟美元息息相關，成也美元，敗也美元。

今日大笨象（00005）派成績表，亦會左右呢個星期本地魚缸去向，較早前有消息指，大笨象在花旗的滙融，或要為信用卡及個人信貸業務作出超過預期的撇帳額，或拖累整體業績表現。大笨象份成績表是龍是蟲，古勝烏卜卜，但睇上周五大笨象在ADR跌幅尚算溫和，又唔需要對其業績睇得太悲觀。至於另一批恒指權重股石油股，「油魔」精神與否對佢哋影響重大，若然油魔能夠振作，對魚缸亦會帶來支持。以目前全球的經濟狀況分析，全球央行暫未有條件退市，只要低息環境持續，料魚缸完成整固後，仍有條件持續升浪。

潛水幅度略嫌誇張

中國中冶（01618）九月中旬以6.35元定價招股，挾雄厚背景與業內龍頭地位的優勢，H股招股爆燈指數達204倍，但登陸魚缸首日即潛水，跟之後登陸魚缸的華潤水泥（01313）比較，中冶潛水幅度略嫌誇張。論實力與前景，中冶應更具持有價值，現價有利收集。目前最大H股市值的同類股份是中國建材（03323），超過200億元，但中冶只有百幾億，要後來居上，中冶起碼要升過七蚊樓上。

「小魔怪」日前出過吹水報告，指中冶在鋼鐵及非鐵類工程及建築方面具優勢，業務也邁向多元化，故建議買入，目標價為6.4元，即接近招股價，較現價有兩成上升空間。

古勝