本文重點
美國蘋果公司業績理想，為台灣嘅科技製造股展開升浪之外，其實喬布斯其中一個得意之作iPod已進佔世界主要城市，成為反映美元強弱嘅指標之一。澳洲就有機構參考iPod喺各國嘅售價，製作咗一個iPod價格指數（iPod Index），並發現喺美元疲弱下，直接向美國訂購iPod相信係最明智嘅選擇！
阿根廷售價最貴
由澳洲機構製作嘅iPod指數，理念與「巨無霸」指數類似，主要係以美元為單位，比較同一貨品喺不同市場嘅售價，從而分析唔同市場嘅購買力與匯價變動情況。
統計就發現○七年正式推出嘅iPod Nano 8G，喺美國嘅售價一直維持於149美元水平，但喺世界其他市場，售價就節節向上，其中部分原因相信與各國貨幣嘅匯價轉強有關，以定價最高嘅阿根廷為例，售價更由○七年嘅317美元升至336美元。
去年十月金融海嘯期間，iPod喺澳洲嘅售價曾平過美國，但今年情況已完全改變，澳洲售價一年間升咗38%；至於貨幣與美元掛鈎嘅香港，售價就一直維持喺147至150美元水平。
余絲韻