港股在「十‧一」假期前偏軟，但又唔算走樣，恒指跌57點，雖未能守在二萬一關之上，但成交有限，反映沽壓唔算嚴重。不過從大部分股份表現，加上近日上市新股相繼潛水，詩詩大概推測到港股已喪失上升動力，問題係未見有大量資金撤走前，港股暫無大跌風險。至於詩詩所持國美（00493）能守在2元之上，暫時無沽貨打算，只怪當初買得太急，諗住供股賺咗一筆，急急腳2.4元上番車，若然呢排先買貨，坐貨就舒服得多。
香港資源（02882）在之前股仔炒到出煙之時，唔多覺被熱捧，反而低調而務實地進行收購金至尊股權，有關收購在七月底已完成，目前香港資源持有金至尊三成以上股權，料稍後將向金至尊其他股東提全購，並協助公司盡快完成重組，安排重新上市。金至尊未來將主攻內地市場，並計劃登陸A股國際板。
詩詩相信，金至尊未來將會為香港資源帶來可觀收益，短期則可受憧憬金至尊復牌的消息刺激，值得留意。
詩詩