「十‧一」假期前夕，港股又再腳軟，新股無力，甚至上市首日即潛水三成，市場上悲觀情緒愈來愈重。雖然暫時外圍股市仍在高位徘徊，未現沽壓，所以恒指得以保持高位，不過觀乎一眾股仔，可以講係每況愈下，愈殺愈低，大市頂得幾耐亦都冇人知，各位鑊鏟友真係要提高警覺。
內地負面消息一個接一個，產能過剩等等問題，令資源股同工業股沽壓重重，睇怕市場上得番最有景嘅內需股值得追入，好似隻銀泰百貨（01833）咁，走勢真係靚絕，一浪一浪咁炒上去，即使近期市場氣氛咁差，佢嘅走勢亦都無走過樣，現時喺5蚊水平橫行收集多時，周三似要再發力，唔排除會更上一層樓，咁嘅時勢，仲有咁嘅走勢，不如入場博佢一鋪，上望6.5元，而止蝕位定於4.5元。
古晨