花旗周三晚公布芝加哥採購經理指數竟下跌至46.1點，低於50點的盛衰分界線，一度拖累道指早段挫逾百點，但可能因季結關係，最終道指跌幅收窄至不足30點，力保9,700點關。各地魚缸似乎已失去上升動力，但在沒有特別利淡消息下，加上未見有資金撤走，令各地魚缸在現水平唔上唔落。

紅色錢莊漸得寵

睇番本地魚缸，近日主要靠大笨象撐起魚缸，另一重量級祖國移動（00941）表現疲弱，芬佬對其寵愛程度大不如前，反而紅色錢莊更受捧。八卦公話紅色錢莊愈升愈有，除咗芬佬追捧外，建行（00939）、工行（01398）及中行（03988）一直「互相欣賞」，三行暗地互購，以致股價愈推愈高。呢個缸湖傳聞有幾成真，古勝烏卜卜，但紅色錢莊「錢途似錦」，得寵程度持續上升卻係事實。

近日登陸本地魚缸新丁，果然係一蟹不如一蟹，周三登場的華南城（01668），甫登場即潛水，最多較招股價2.1元跌逾三成，散場報收1.62元，較招股價跌23%。至於今日登場的恒盛地產（00845），「龜孖屐」價大幅插水，較招股價4.4元低兩成，今日登場表現唔樂觀。

品牌推廣受重視

至於早兩日登場的匹克體育（01968），同樣係上市即潛水，翌日即假期前逆市升4.4%，報收3.55元，較招股價4.1元仍然跌咗超過一成。匹克招股發行100%新股，原有幾個大股東未有藉上市機會套現，係對公司前景睇好的表現。

匹克計劃將上市集資的接近一半資金用於媒體廣告、品牌推廣及營銷活動，有投資者質疑公司過於依賴廣告與營銷，未有用作支持主要業務發展。管理層已解釋，集資額當中兩成資金是用作產品研發與擴大生產，對於許多祖國企業來講，品牌與渠道係發展的重要跳板，匹克上市集資，通過投入，鞏固品牌影響力、拓展渠道，其目的正係為促進公司產品的銷售，因此這部分投入，亦係用於支持主業發展。

祖國的運動品牌市場強敵林立，品牌的提升不僅體現在開店數量上，配套的廣告宣傳必不可少，匹克在廣告和品牌宣傳上一擲千金，當然有其原因。睇番匹克周三的表現，似乎已消化首日沽壓，有望逐步收復招股價失地，加上祖國零售股最近受芬佬追捧，在現水平收集作中線投資，料可錄得不俗回報，短炒則先睇股價重上水面。

古勝