美股雖然上周五唔算跌得勁，但尋日日股開市顯著下跌，內地股亦級級落，港股沽壓重重。恒指收市跌435點，收報20,588點。大市走勢偏軟，詩詩相信結算過後，跌勢或進一步加劇。詩詩所持國美（00493）走勢進一步轉壞。若然大市真係作較大幅度調整，詩詩或需忍痛止蝕，順手進行季結，待市況轉穩後再考慮重新上車。
統一企業（00220）上半年盈利增長1倍至4.27億元人民幣，雖然營業額下跌，但毛利率卻上升。統一為改善盈利，曾對產品結構進行調整，相信方便麵產品結構改善仍會持續反映於未來業績，故有大行報告調高其今明兩年盈利預測。
值得留意係，統一相對其他中資食品股的估值便宜，今明兩年預測市盈率均不足20倍，較同類股份更抵買。根據資料顯示，T.Rowe Price Associates於本月初，在集團公布業績後，曾以每股平均價4.294元增持股份，令其持股數目增至2.1億股，持股量增至6%。基金睇好其盈利前景，可以趁調整吸納。
詩詩