本文重點
買樓向來係唔少香港人嘅投資首選，周不時都會聽到有城中名人出手買吓豪宅，不過內地就唔同，有「重慶碧桂園」之稱嘅龍湖地產喺北京就有個樓盤，每方米售價竟然賣成7萬蚊（人民幣‧下同），最貴嗰間「樓王」單價仲要成2億元，但係所有買家都只係名不見經傳嘅人，認真奇怪！
最近市場盛傳籌備緊嚟香港上市嘅龍湖，依家喺北京已經有8個項目，絲絲講緊嘅「樓王」就係嚟自其中一個叫頤和原著嘅樓盤，老友話呢個盤總共有差唔多60間屋，平均每間屋面積2,000方米，最大嘅仲去到3,000方米，即係差唔多3萬呎！用每方米7萬蚊計，即係賣價去到2.1億，已相當於香港唔少中型上市公司一年嘅純利！
「樓王」買家僅18歲
個盤賣得咁貴，絲絲梗係要八吓買家係乜嘢人啦，老友就話頤和原著依家已賣咗一半，不過買家就清一色係名不見經傳嘅人，至於價值2億嘅「樓王」最近就啱啱有買家落訂，呢個買家甚至只得18歲，老友就話內地人最怕「樹大招風」，可能呢啲買家都係有啲名人撐腰，不過都只可以靠估啫！
余絲韻