本文重點
一份工做10年，真係幾長情，原來藺常念喺富昌證券已做咗10年，近日仲正式攞咗個「老人牌」。話說富昌金融上周五喺港麗酒店擺咗25圍，慶祝公司十周年誌慶，仲請咗一班明星唱歌、跳舞助興，場面咁浩大，絲絲當然獲邀出席。身為富昌證券總經理嘅藺常念當晚更獲頒「十年長期服務獎」，得到足金金牌一個。
當絲絲問番佢得獎感受時，藺Sir就講笑話自己終於拎到個「老人牌」，佢飲多兩杯落肚之後，仲盡吐心中情：「其實人生有幾多個10年呢？而我喺富昌呢10年就做得好開心。」講真句，10年唔係一個短嘅時間，絲絲知道藺Sir喺富昌搵到錢之餘，又做得開心，真係夫復何求呢！
富昌鋪路內地設辦
最近市況轉好，絲絲梗要問吓富昌嘅未來發展，藺Sir話依家公司喺上海、成都和深圳已設立咗投資諮詢辦事處，若中國經濟市場正式打開，到時就會喺當地開辦證券行，目標成為大中華地區嘅大型金融集團。嘩！聽到藺Sir嘅雄心壯志，果然係有諗頭嘅「開國功臣」。
余絲韻