本文重點
金管局總裁任志剛明日Last day，之後可以優哉游哉咁過退休生活。呢個月佢真係忙到冇時間返屋企食飯，皆因歡送會排到密麻麻，尋晚銀行界為任總舉行咗一個好盛大嘅歡送會，絲絲去到會場見到場面非常墟冚，因為是次宴會筵開35席，即係至少有幾百位「賓卡」同任總餞行，冠蓋雲集，由此可見任總嘅江湖地位。
席間銀行公會與銀行學會仲齊齊為任總獻唱，其中包括第一代《射鵰英雄傳》嘅主題曲《世間始終你好》、《獅子山下》及《We are the Champions》，聽完啲歌詞，絲絲覺得真係好似武林盟主金盆洗手，任總亦高唱一曲《My Way》回敬一眾「賓卡」。
贈DVD輯錄卅載風采
除咗唱歌表達吓大家感情，當然唔少得致送紀念品，銀行公會與銀行學會好有心思，整咗一隻20分鐘嘅DVD畀任總，係由任總七十年代至今出席公開場合嘅錄影剪輯而成，絲絲簡直係一次過重溫任總三十幾年嚟做到變「白頭」嘅經歷。
三大發鈔行更加直情送錢畀任總添，點解咁市儈？非也，送畀任總嘅係各行發行嘅一套「茄殊」，認真夠晒氣勢。
余絲韻