比亞迪升3倍多得股神

《2009胡潤百富榜》顯示，王傳福身家有350億元（人民幣‧下同），成為中國首富；而○六年首富、玖紙（02689）主席張茵家族身家有330億元，排第二位。

王傳福被稱為「技術狂人」，又稱「汽車狂人」，佢名下嘅比亞迪自去年獲巴菲特入股10%後，股價「砰砰聲」咁升，今年升咗3倍，帶挈王傳福身家水漲船高，較去年豐厚咗290億元，仲一躍龍門登上榜首添！王傳福與張茵一樣，都係搞環保事業。

胡潤海南放榜有段古

咁點解胡潤要喺海南清水灣公布胡潤榜呢？原來胡潤喺五月時，差啲登上咗因為飛越雷雨區時墜毀嘅法航飛機，好彩當時佢訂早咗一班機逃過一劫。當時胡潤咁啱見到清水灣嘅宣傳單張，上面寫住It is your second life（這是你的第二次人生），佢覺得同自己嘅經歷不謀而合，覺得要珍惜人生同埋做啲更有意義嘅事。其後佢仲受風景吸引，而喺清水灣置埋業添！

余絲韻