大市一彈即散，上周五恒指重返21,000點，市場信心恢復番少少，部分股仔更見回升，諗住啲炒味返嚟，結果一轉頭又無晒影。全球研究點退市，唔少資金都持觀望態度，短期睇怕都幾難搞，暫以守勢為上策。
炒股唔炒市，就算大市無咩料到，但個別股份都有炒作，內需股仍然係市場焦點所在。中國動向（03818）中期純利有7.22億元，雖說只有5%增長，如果扣除番○八年上半年奧運嘅一次性效應，純利實質增長係41%先啱，算是有晒交代。上半年旗下主力品牌Kappa嘅銷售額，仍能維持30%高增長水平，係各大內地品牌中增長最大的，值得把握每次回落時吸納，向上暫睇7元，止蝕位不妨放於4.5元。
古晨