先向即將退休嘅金管局總裁任志剛講再見！對任總有讚有彈係好自然，唔同人對佢嘅評語亦可以好極端，但無論如何，佢能夠在位咁多年已證明佢係能幹之士。我就最欣賞任總眼光夠遠，上周喺港大有學生問佢，喺全港最高嘅國金二期88樓返工有乜感受？佢答喺辦公室可以望得好遠，甚至連珠海都見到，但好少機會望出窗。我都無乜機會望出窗㗎，但任總嘅眼光比我遠好多，大家喺同一幢樓返工，自問都算係「高層」，但我最遠只望到青馬大橋咋！

「退市」只得個講字

另一個想同佢講再見嘅係衰退。美國聯邦儲備局上周維持息口不變，仲話經濟有復甦迹象，又暗示會進行「退市」措施。奇怪在呢個原來唔係好消息，因為美股應聲下跌，港股亦都無法幸免。嚴格嚟講，我認為環球經濟係「見底」，唔代表「復甦」。雖然各國政府話「退市」，我估只會講，唔敢做，但長貧難顧，政府托得幾耐？經濟真正復甦始終要靠企業及消費者增加開支。作為消費者嘅你，有無呢個打算呢？

唯一可肯定嘅係，我哋同衰退真係會「再見」。經濟循環起伏係定律，我擔心當衰退返嚟時無咗戒心，唔識走避，因為人喺投資市場中往往好善忘及短視。

最後，唔知你哋仲記唔記得曾經喺呢個版面出現過嘅Baby？佢真係唔簡單，決定一個女仔孤身走去德國讀書，今晚就會上機。我記起英文有句話，「A good-bye is never painful unless you're never going to say hello again」，中文即係「說再見從不痛苦，除非再沒有機會說聲你好。」喺度借少少空間向Baby講聲「無痛再見」！

大健