炒股家族 分攻 合作

陳氏一家三口平時最鍾意一齊去聽投資講座，因為陳爸爸嘅投資眼光獨到，阿仔Thomas見佢炒股功力深厚，亦漸漸對投資產生興趣，九五年一家三口開始不斷交流投資心得。上周五我同莉莉約咗佢哋吃飯，大家所傾嘅都係離唔開股經。

莉莉：「講錢傷感情」，你們係咪會集資一齊投資？

陳生：我們嘅錢分3份，股票戶口分3個，新股都係各自各抽嘅。只不過我對各類嘅財經資訊最Update，所以佢哋多數會問我意見，但我唔會逼佢哋跟我做投資。

陳太：我們只會用自己嘅錢去投資，並無設立共同基金，大家只係交流意見，決定權喺自己手上，即使輸咗錢，都唔會去埋怨對方。

阿爸「最In」當軍師

高妹：「三人行，必有我師焉。」你哋三個之中，由邊個「牽頭」？

Thomas：阿爸係投資專家，佢收到嘅財經資訊又多又快，我有好多投資基本概念及知識都係向佢請教嘅。

陳生：唔好話我係專家。不過Thomas最初投資時，正係「學飛」階段，遇上唔明白嘅地方都會問我，雖然佢依家仲未「識飛」，不過我相信佢遲吓一定可以愈飛愈遠。

高妹：年輕人投資時容易心高氣傲，咁Thomas你又有無試過唔聽爸爸勸告而衝動入市？

Thomas：我第一次買窩輪時，投資知識不足，但以為自己有足夠能力去做決定。後來開始同阿爸出現意見不合，佢認為係A時，我就認為係B，最後我睇錯咗方向，輸了啲錢，算係買個經驗。

陳生：嗰次事件我都有啲不開心。不過，有時候大家意見不同，有拗撬都係正常，他又唔係「應聲蟲」，投資時有自己想法都係好嘅。

陳太：其實佢哋唔會嘈得好激烈，但我有時都會喺阿爸呢邊哄吓，阿仔嗰邊哄吓。

情侶投資互補長短

至於小情侶Derrick和Rachel，男嘅係投資銀行交易員，女嘅係財經公關，兩口子襯到絕。佢哋喺投資時，男方又會唔會畀女方「食住」呢？

Derrick話佢哋好少夾份買股票，但會交流投資意見。「今年初我本來想投資買樓收租，點知銀行收緊樓宇按揭，直到市況轉好，業主又坐地加價5%，當時Rachel話覺得樓價升得太多，叫我唔好買住，最後都有聽佢意見。」

由於Derrick從事金融業，投資知識較豐富，變相成為Rachel嘅貼身金融導師。Rachel話買股票時自己會先做資料搜集，然後再問男友，喺佢嘅專業意見指導下，會更有信心入市。她笑言：「佢會幫我定止賺及止蝕位。」

男友當導師教選股

Derrick話兩人性格既理性又成熟，所以好少因為投資而嗌交。當Rachel投資蝕錢時，都會向Derrick「呻」幾句，呢個時候佢就會立即變身導師角色，解釋輸錢原因，希望女友可於失敗中重新學習。喺Derrick長期嘅選股教學下，Rachel已較以前變得獨立，依家仲會自行投資買賣。睇到佢哋喺投資上互補長短，又唔會因投資而傷到感情，相處之道真有一手。

「但願人長久，千里共嬋娟。」中秋節最重要都係一家人齊齊整整、健康快樂。最近股市牛皮，大家會唔會睇吓債券？中國財政部首次在港推出人民幣國債，散戶究竟會唔會認購？據《東方產經》網上民調，截至上周末晚上6時，47.9%散戶話會認購，話唔會認購嘅就有52.1%。

唔經唔覺又到中秋，諗起今日係我朋友仔SOSO嘅生日，喺度祝佢生日快樂，亦預祝各位親愛嘅股友中秋節快樂。

若有料報畀高妹同莉莉或有嘢問，可電郵money.biz@opg.com.hk

高妹