聯儲局上周議息維持息率不變乃意料中事，但會後聲明要為退市作好準備，同時表示放慢購買按揭證券步伐，華爾街視之為閂水喉的前奏，花旗魚缸連跌3個交易日，看官亦要為各地魚缸步入調整期作好心理準備。

結算後沽壓料加大

第三季度只餘3個交易日，古勝相信基金經理的粉飾櫥窗活動已執行得七七八八，唔排除期貨場結算過後，更大沽壓湧現，進一步拖低魚缸。古勝睇番公仔圖表，恒指走勢已形成島形頂，除非盡快回補21,400點的下跌裂口，否則好友再努力，本地魚缸能守住二萬一已偷笑，暫難言再向上突破，並將受制在21,400點之下。既然「伯哥」已擺明車馬在未來日子，或閂水喉退市，即使G20峰會上，各國已有共識，為確保經濟復甦，未宜過早退市，但上半年多國央行為救市均瘋狂放水，下半年閂水喉亦無可厚非，各國元首會否暗度陳倉，採取適當措施逐步退市，古勝烏卜卜，但只要收水力度溫和，預料在魚缸正常調整後，第四季內仍有機會重拾升軌，再向年內新高挑戰。十月若魚缸調整，反而係上車好機會。

百麗國際（01880）已派成績表，半年盈利按年增長近兩成至11.4億元（人仔‧下同）。集團整體銷售額按年升13%至93.1億元，運動服飾產品在盈利率及銷售方面優於預期，核心業務的鞋類產品則僅僅符合市場的預期。不過百麗新收購業務的銷售及毛利率仍低企，盈利能力改善速度可能未如預期，相信盈利增幅會由今年的20%，在○一至一一年間，放緩至12%及10%。

成本控制得心應手

雖然百麗份成績表欠驚喜，但管理層表示經濟最壞時刻已過，復甦在望。尤其在折舊及攤銷開支持續減少下，百麗在控制成本方面更得心應手。古勝相信，百麗值得揸長線，問題係要吼個靚位上車，況且十月大市較大機會調整，不如等股價去到7元樓下開始吸納。

古勝