外圍股市偏軟，恒指一度失守21,000關，午後內地股市倒升，港股跌幅收窄，恒指報收21,050點。個市開始跌，詩詩怕死又無入場，不過睇番唔少二三線表現又唔係曳，好似批股完唔死的光大國際（00257），肯博肯追又唔係話無得搵食。詩詩長線持有國美（00493）策略不變，花旗最近出報告建議買入，加上內需股亦被睇好，有實質業績支持，唔怕畀耐性坐貨。
天津創業環保（01065）昨日逆市上升4.4%，高收2.11元，收復10日及50日線，相信調整已完成。再睇光國同屬水務股，批股後有如此強勁表現，可見大行睇好行業發展，早前高盛亦曾調高創業環保的盈利增長。
由於環保概念是國策扶持的重點行業，天津創環以污水處理為主業，穩步開拓市場，市場定位為立足天津，並成為服務全國的水務投資營運商。該公司管理層日前披露，正與天津市政府深入磋商，爭取城區內40座污水處理廠特許經營權，年期長達30年，其業務規模未來將以倍數壯大，前景值得睇高一線。
詩詩