本文重點
任總臨別在即，雖然佢喺上月舉行嘅最後一次記者會上，與傳媒分享話自己無乜朋友，但絲絲睇嚟任總此話非常值得商榷。近來不知幾多人同佢Farewell，食完一餐又一餐，銀行公會及銀行學會下周一會同佢搞個歡送晚宴，至於主要成員同樣係銀行界人士嘅財資市場公會（ＴＭＡ），尋日先同任總Farewell完，不過形式就較為簡單，只喺金管局嘅五十六樓搞咗個酒會。
話明繼續參與老本行
依家仍然係ＴＭＡ名譽會長嘅任總，第日唔知有無得做呢個位？但佢肯定可以做ＴＭＡ嘅會員，因為尋日恒生馮孝忠就代表ＴＭＡ向任總頒發咗一張終身會員嘅證書，與會人士仲好踴躍同任總影相，所以話任總又點會無乜朋友呢？
任總喺尋日嘅場合仲同大家講咗一啲弦外之音，佢話即使自己離開金管局，但仍會繼續參與金融市場，在場人士個個都估佢梗係去人行做顧問，至今只得呢個傳聞，絲絲都會咁估，若然係真，都算係金融市場之福。
余絲韻