話說上世紀九十年代初，中央財政收入嚴重不足，被譏為「懸崖邊上嘅中央財政」。喺九三年中，時任副總理嘅朱鎔基話，依家如果仲唔改革，捱唔到二○○○年，中央財政就會「冧檔」！

後來中央派咗十三個部長去二十六個省市做調研，返中央後一人寫一條拎去國務院討論。當時主管經濟工作嘅朱鎔基笑言十三條唔吉利，要加幾條，後來就成為咗十六條嘅「中央六號文件」嘞。

朱總親征瘦咗五磅

其實朱總當年都帶住官員親征，用兩個幾月走勻十三個省，面對面同地方官算帳。項掌櫃幾乎跟足全程，唔係加班就係捱通頂，日日東奔西跑，對住地方官不時要忍氣吞聲，唔得就軟硬兼施。最後全部傾掂，朱總話自己足足瘦咗五磅。

項懷誠仲話，曾經就稅收返還應該由邊一年開始同朱總拗過，依家諗番都心悅誠服，咁重大嘅改革一定要得到地方支持嘅。

余絲韻