本文重點
早前市場有消息話，專辦各類證券業註冊考試嘅證券專業學會由於近年出現收支不平衡，正研究提高考試費用，呢個消息終得到證實。話說證券專業學會已發出公告，通知各界由本月開始，調整證券及期貨從業員資格考試嘅費用。
規例試卷（即卷一、卷二、卷三、卷五及卷六）每張嘅考試費用由600蚊加到750蚊，加幅25%；應用試卷（即卷七、卷八、卷九、卷十一及卷十二），每張嘅考試費用由380蚊加到480蚊，加幅26%。考生必須要考取卷一、卷七及卷八呢3張卷，才可成為股票經紀替客戶買賣。
今次考試費用加價，並無引起市場好大反彈，絲絲心諗，一來證券專業學會事前做咗唔少游說工夫，二來可能與股市近期「升呢」有關。
市旺加價啱時機
大家都知，股市升自然多人應考，唔會太在乎加價。咁又係，個市升番，每張試卷加價百幾蚊，肯定唔係問題，正所謂股市賺嘅都唔止啦！所以今次加價都算係加得合時。
講開又講，證券專業學會每年都會率領業內人士出訪海外，拜訪外地監管機構及發掘商機，繼上海、深圳、北京及吉隆坡後，由於兩岸三地近期金融合作頻繁，今年佢哋會訪問台灣，拜訪當地交易所、期交所及財金部門等。
余絲韻