本文重點
尋日係美國國際集團（AIG）「爆煲」一周年，雖然內地受波及程度唔算嚴重，但仍好認真咁總結經驗。中國保險行業協會與國壽（02628）一齊搞咗場探討誠信及風險控制嘅研討會，主角之一嘅友邦中國區首席執行官蔡強感嘆話，如果公司太注重短期業績壓力，遲早都會出事。
「一哥」促共建對話機制
國壽老細楊超平時最鍾意講央企嘅誠信及社會責任，由佢一手承辦呢個會，自然最有說服力。「一哥」登高一呼，平保（02318）等同業高層都畀面共聚一堂，唔怪得超哥精神奕奕，又被讚精力充沛兼且講嘢擲地有聲。
超哥話，過去一年大家都目睹著名企業由於失信、管控不足而走向破產，金融海嘯喚醒咗企業嘅良知與責任，大家應該傾吓，共同建立一個保險行業嘅誠信對話機制。
蔡強就話，佢哋得到嘅教訓就係，唔應該成日睇住短期業績或者銷量，要頂得住股東嘅壓力，諗多啲客戶嘅利益同埋價值。
余絲韻