港股尋日終於作出突破，大戶借滙控（00005）回歸A股消息，再入市大挾淡倉。滙控回歸A股非一兩日間嘅事，睇怕今次挾淡倉行動，又有排挾了。市場明朗化，氣氛亦見好轉，就連啲股仔亦開始郁郁吓，市場就係咁，唔郁無人買，一郁就個個搶，睇怕又係時間揸起鑊鏟入場搏殺。
今次升市，主要係基金入市推動，啲二線基金股最有留意價值。早前中油香港（00135）被傳會注入天然氣項目，結果雷聲大雨點小，只係以3,500萬元收購山西天然氣項目，前日集團再以6,144萬元增持深南石油權益，照睇注資應該陸續有來。睇番其股價，近期累計跌幅真係唔小，只要注資持續，有炒味股價要上番高位有何難，有勢不妨跟炒，向上睇8元，跌穿5.5元才作止蝕。
古晨