本地魚缸昨日跟隨高開，雖然祖國魚缸唔精神，但港股一於好少理，晏晝恒指成功突破埋上個禮拜高位，最後以接近全日高位21,402點收市，全日升536點，成交金額亦增加至699億元。港股牛皮咗幾日，尋日乘住華爾街做好挾上，由於恒指啱啱破位，而且成交都似樣，睇嚟短期會再試高位，想做淡真係要忍一忍手。

祖國錢莊強勢畢現

大市氣氛向好，大笨象（00005）破位而上，全日升咗3%，而祖國錢莊明顯有資金流入，六行中除咗招商銀行（03968）同中信銀行（00998）外，其餘四行都創咗一年新高，成為帶動大市上升重要動力。

其他國企股亦未有受祖國魚缸唔精神影響，其中金礦股表現一枝獨秀，瑞金礦業（00246）升18%，招金（01818）亦升近一成，只要金價繼續做好，金礦股仍有升無跌，但係佢哋升得太急，古勝都無信心高追，不如留意番啲落後板塊，值博率應該會更高，好似煤炭股，早前走勢明顯落後於大市，但係尋日佢哋再度蠢動，相信隨時發力炒上。

兗州煤業（01171）上半年盈利雖然倒退48%至只有20.26億人仔，但係表現就較市場預期好，其中商品煤銷售量達1,770萬噸，同比下跌4.6%，惟第二季嘅銷售量較首季高出近兩成，反映經營已有改善。

收購成上升催化劑

祖國已推出多項措施振興經濟，以鋼鐵業為例，上半年有很多鋼材廠房停產，影響精煤銷售，但隨着經濟復甦，鋼材廠房已陸續恢復生產，料精煤需求會回升，兗煤當然可以受惠。

另外，兗煤董事會已審議通過收購澳洲菲利克斯股權，同時已經再次向澳洲外國投資審查委員會遞交了收購交易審查申請，若成功收購，長遠除咗可以為兗煤帶來可觀利潤貢獻之外，短線亦可成為刺激股價上升催化劑。兗煤A股已連升四日，H股好明顯跑輸A股，在追落後下，H股隨時發力。

近日摩通同埋瑞銀先後喺市場吸納兗煤嘅股份，而且多間大行對佢前景睇法都幾正面，好似大摩喺中期業績公布後，將佢評級由「弱於大盤」調高至「中性」。尋日兗煤成功突破50日線，成交亦見增加，睇嚟短期可以挑戰一年高位13元，若然成功突破13元，中線應可上試15元，不妨跟進。

古勝