有唔少富豪會培養自己下一代「承繼衣鉢」，玖龍紙業（02689）董事長張茵亦唔例外，佢同絲絲講，好高興兒子劉晉嵩喺上月成為公司嘅執行董事，依家協助父親及舅父喺公司做採購及發展嘅工作，張茵力撐阿仔有實力，但今次未見阿仔影蹤，佢話依家仍未係時候見大家。
劉晉嵩雖然只有27歲，已成為玖紙嘅執行董事，玖紙上市時，只有24歲嘅佢已經係公司非執行董事，被外界質疑年紀太輕不應入董事局，今次再次被人質疑佢嘅能力。張茵愛子心切，再三強調從小已培養兒子，對佢好有信心。
絲絲知道劉晉嵩雖然工作經驗較少，但學歷高，已取得加州大學經濟學士及哥倫比亞大學工程碩士學位，加上有「世叔伯」睇住，工作上應該冇問題。絲絲覺得低調都有好處，始終佢哋係做實業，又唔係做明星，唔一定要見記者，最重要係做好本分。
余絲韻