本文重點
被踢爆與新婚妻子高調逛名店購物嘅台灣太平洋電線電纜前董事長孫道存，畀人質疑有錢買嘢、冇錢還債，尋日卒之要去稅局解畫。如果唔係佢答應10日後提出清償計劃，恐怕有即時收監之虞。
稅局火滾踢竇查封
孫道存一直欠台北市稅局3.06億元新台幣稅款，佢拖住老婆逛名店嘅相曝光後，稅局嬲到紮紮跳，周三先去佢嘅豪宅查封一個保險箱、558樽靚酒、玉佛像、水晶玻璃等物品，同時要佢周四去稅局交出還錢方案。
尋日孫道存同稅局講，話媒體指佢過着奢華生活係報道不實，佢名下無房產、無信用卡，依家只係用緊嗰女畀佢嘅附屬卡。佢仲話法院仲未勒令佢破產，所以個人點樣收支同還債要遲啲提出。
不過稅局唔理孫道存要求寬限個半月後至提出清償計劃，一口價要「10日內提交還款計劃，半年內還清」，如果佢拎唔出，即刻同法院申請將佢收監。講番佢個保險箱，開咗後確定全部係佢前女友張瓊玲嘅文件同首飾，睇嚟遲啲都係要解封嘞。
余絲韻