根據法規，香港居民每日只可兌換兩萬人仔，一百九十萬即係最少要分九十五日執行，以鄭大班嘅身家，一百九十萬對佢嚟講濕濕碎，而且依家科技進步，佢大可以一早落「柯打」兌夠一百九十萬，話唔定佢一早已經儲咗唔少人仔，不過親身用錢支持就夠晒誠意。

落分行搞無特別優待

滙豐中國六月底嗰陣已經發咗人債畀機構投資者，零售部分就要等到上個月至開始認購，六月嗰時大班都叫咗大家唔使失望，零售人債遲早都會發行，原來鄭大班對買人債都有興趣，所以佢都陪大家等咗兩個幾月。

實施新嘅銷售程序後，所有投資者買人債都要落分行做，據聞鄭大班都無特別優待，要同客仔一樣經歷漫長銷售。好在鄭大班未夠六十五歲，如果唔係仲煩，又要有人見證，閒閒哋要搞一、兩個鐘。

余絲韻