本文重點
靈活變通絕對喺勝獅貨櫃（00716）身上看到，面對航運危機、出口大跌，勝獅行政總裁張松聲諗到將貨櫃變成住屋，喺金屬貨櫃箱內裝置家具、電器及浴室工具，然後賣畀客戶，佢呢個方法「一石二鳥」，既可解決因環球衰退引致貨櫃箱需求大跌，又可應對住屋需求，最重要當然係為公司搵到新財路。
內置家具售23萬起
勝獅話裝喺貨櫃內嘅家具由內地運來，然後喺裝置地點組合，貨櫃箱就作為屋宇牆身，價錢則由3萬至10萬美元（約23.4萬至78萬港元），視乎要幾多間房及設備要求。張松聲話已取得南太平洋兩個國家「貨櫃住宅」合約，現正接觸非洲及澳洲嘅買家。
除咗「貨櫃住宅」，勝獅仲拓展特種貨櫃箱市場，早前售出400個內裏裝有魚缸嘅特別貨櫃，方便長時間運送鮮魚，呢類特別魚缸有製冷功能，令批魚喺長途旅程中瞓覺，唔會游來游去造成損傷，相對傳統貨櫃只值2,131美元，呢批運魚特別貨櫃箱價值高10倍，每個2.5萬美元，一個抵十個，利潤自然好好多。
余絲韻