本文重點
《亞洲華爾街日報》揀出最受推崇嘅公司，香港老牌本地銀行恒生（00011）一舉拎咗好幾個獎，仲要喺財務及企業聲譽呢兩項中高踞榜首，絲絲覺得大家絕對明白，淨係恒生冇賣迷債、盈利硬淨以及維持派息呢幾方面，已經跑贏其他企業。
港最受推崇排第3
除咗財務及企業聲譽呢兩項外，恒生唔止喺銀行界威，同其他企業相比，佢哋亦係「香港十間最受推崇公司」嘅第3名。絲絲見唔同企業都企埋一齊比併，就問吓個調查點嚟，原來呢個「亞洲200間最受推崇公司」調查，有12個國家共2,600名專業人士參與，絕對唔係「圍威喂」揀間本地薑就算。
恒生副董事長兼行政總裁梁高美懿話，喺財務及企業聲譽呢兩方面排第一真係好開心，佢哋會繼續努力滿足唔同客戶嘅需要。今次評分標準仲包括遠見、品質及創新，絲絲認為恒生淨係繼續爭取有遠見嘅分數，其他企業都唔容易追得上，只要幫客戶同股東搵到錢，「最佳銀行」呢啲獎隨時拎到手軟。
余絲韻