本文重點
喺IT界紅極一時嘅李開復要離開効力咗4年嘅Google！內地《新華網》報道，Google全球副總裁兼大中華區總裁李開復尋日正式辭職，據稱佢拒絕咗Google提出公司天價股票及Google亞太區產品和工程總裁嘅續約邀請，佢係為咗心中一個未完成嘅理想，聽講佢有意試吓自己創業。
與年輕同胞創新技術
喺○五年Google為咗得到李開復嘅加盟，曾與微軟展開一場挖角大戰，更一度鬧上法庭，好在當年雙方最後秘密和解，而李開復亦如願由微軟過檔Google。講番今次辭職，原來李開復喺六月時就已打算請辭，但當時Google中國忽然發生咗急需處理嘅事，所以佢多等兩個月先辭職。佢話Google係佢做過咁多間公司中，最令人震撼嘅一間，又話對於Google佢已經無乜遺憾。但佢話個人就仲有一個缺陷，所以希望去彌補，就係要同中國年輕人一齊打造新嘅技術奇迹喎！聽佢咁講，絲絲相信唔使好耐，李開復就會「開開心心咁復出」。
余絲韻