本文重點
總部喺香港嘅國壽（海外）尋晚舉行25周年酒會，國壽（02628）董事長楊超親臨主持盛會，絲絲見到超哥風塵僕僕，原來佢上星期嚟香港開完業績發布會後，就去咗澳洲、印尼路演，回程又兜番嚟香港，成個星期未曾返過北京，真係辛苦晒喇！
超哥開派對，政商界人士都畀面捧場，現場眾多「賓卡」及金融界高層之中，最令人眼前一亮嘅係永亨銀行（00302）董事長兼行政總裁馮鈺斌。因為國壽去年曾經想收購永亨，雖然最後唔成事，但係呢一層「緋聞」關係，令到馮董嘅身份變得好特別。
馮鈺斌被問合作彈開
絲絲同馮董打招呼，佢都好友善，但當一開口問佢同國壽仲有無傾合作，佢就成個人彈開咗。絲絲希望無破壞到人哋嘅好事，始終大家等國壽出手等到頸都長埋！
中國太平（00966）總裁吳俞霖及民安控股（01389）行政總裁鄭國屏都有蒲頭，佢哋雖然忙緊收購及私有化嘅嘢，但都抽空嚟捧舊老細超哥嘅場，真係有情有義。
余絲韻