有人辭官歸故里，有人漏夜趕科場，金融界都係咁。已好耐無擔任上市公司職務嘅溫文儀，以58歲之齡再次步入職場，入主香港建設（00190）做執董兼董事總經理（MD）；反而52歲嘅富邦董事總經理兼行政總裁李晉頤就宣布提前退休，不過會留任資深顧問至今年底。
旗下測量師行有合作
溫文儀以前喺恒地（00012）打過工，近年就低調好多，大部分時間打理自己間測量師行，又做吓同地產有關嘅公職，佢尋日開始返香港建設做執董及MD。其實佢之前都有做過香港建設旗下附屬公司嘅董事，今次嘅安排睇落好順理成章；佢旗下嘅溫文儀測量師行早喺今年三月，已與香港建設簽訂顧問服務協議，每年收取720萬元顧問費。至於今次佢做執董，酬金每年10萬元，做MD年薪幾多就未公布。至於香港建設嘅執董陳國芳因為要周圍飛，冇時間兼顧而辭任執董，不過佢就會留任首席財務官，幫公司睇住盤數。
富邦李晉頤提早退休
至於資深銀行家李晉頤提早退休嘅決定，就令絲絲有啲驚訝，富邦話董事會已搵到合適人選接替李生，依家仲有待監管機構批准，而李生就會做到新人到任為止，仲會做資深顧問直至十二月三十一日，以便順利過渡。有中環密友就話，「海嘯」後銀行界爛攤子一大堆，今時唔同往日，睇怕都有排捱，「賓卡」真係唔易做㗎，若然賺夠，抽身未嘗唔係好事。不過掉番轉頭諗，李生可以52歲退休，咁快搵夠享受生活，又真係恨死唔少人。
余絲韻