本文重點
「細個唔靚仔，所以唔鍾意影相。」絲絲估想不到呢個係敦沛證券董事總經理黃偉康（Andrew）唔喜歡影相嘅主因。望真啲，其實Andrew細個時都好靚仔可愛，之後愈嚟愈高大，如今身高六呎嘅佢就向絲絲解開其增高之謎：「爸爸媽媽唔算高大，但我細個時有好多病痛，經常發燒，於是扯到個人高晒。」睇番張相，13歲嘅Andrew差唔多同身邊隻馬一樣高，果然係高人。
絲絲本來以為Andrew讀中學時，應該會喜歡睇武俠或科幻小說，點知佢竟然話鍾意睇各大公司嘅年報。「屋企人有買股票，啲年報會寄去屋企，咁我咪拎嚟睇吓，我仲記得自己同阿媽講，呢間公司業績麻麻，無前景喎！」當時只有14、15歲嘅Andrew已學睇年報，大個仔後唔做金融行業都唔得啦。
少年股神「做過吓」
依家有唔少大學生炒股叻到變成「少年股神」，Andrew笑言自己都曾經做過吓，佢喺九六至九七年間仲讀緊書時，買股票試過最多月賺20萬元，回報率最高達3倍以上，賺到錢更學人走去買名牌。不過佢坦言：「個市升得快亦跌得快，當時自己其實未好了解股票，最後一鋪輸咗八成錢，本金差唔多化為烏有。」此事令Andrew深深體會到股市不能脫離基本因素，亦不可能長時間偏離軌道，都算係「經一事，長一智」。
余絲韻