會計師公會搵咗十位有會計師資格嘅商界領袖分享今次金融海嘯經驗，佢哋包括中國工商銀行（亞洲）財務總監梁銘謙、聯想集團高級副總裁兼首席財務官黃偉明、美聯金融集團行政總裁施德芝、深圳國際控股財務總監謝日康、謝瑞麟珠寶執行董事兼集團財務董事黎子武、寰宇國際控股營運總裁林小強、信義玻璃財務總監劉錫源等。多位財務總監都話，回顧過去，其實危機迹象喺○七年已初露端倪。其中一人話︰「依家固然係事後孔明，但當時各種數據都顯示泡沫將要爆破。」

唔熟衍生產品惹禍

超過半數嘅受訪會計師認為，對衍生產品唔了解係導致市場陷入困境嘅直接原因，甚至熟悉金融產品嘅商業決策者亦並非完全明白衍生工具嘅風險。佢哋亦認為銀行係金融危機嘅罪魁禍首之一，其一原因係銀行實行嘅獎金制度，另一原因係銀行過早追收貸款。

總括今次嘅教訓，企業未來需要不斷降低成本、投資前要對衍生工具有更深認識、準確預測資產變現所需時間以及有多元化收入來源。

余絲韻