佢尋日出席證券專業學會嘅研討會時，就大方承認同政府傾緊續約，但現時未有新合約在手，因為佢有一項「原則」仍要考慮，呢個「原則」同金錢無關。絲絲當然唔放過機會，問佢呢個「原則」究竟係乜？佢就點都唔肯透露。

外間聲音干擾執法

不過，佢尋日嘅演講就有一啲篇幅提到，執法工作受到外間唔少聲音「干擾」，呢啲聲音唔少都係「不相關、不切題」嘅，給予證監會一定壓力，唔知有無弦外之音呢？佢強調執法工作必須保持獨立性，亦要堅定立場。好似喺雷曼迷債事件上，只有獨立運作同避免執法工作受到任何界別利益和影響所左右，才能取得執法成功。

咁又係，睇番成單迷債事件迅速政治化，無論喺立法會、政黨、苦主、銀行以至政府等，過程中或多或少都畀咗不少壓力。問番施衛民點睇同銀行嘅和解方案，佢就話對方案感到滿意，亦唔認為係「讓步」，話證監會從來都無講過會係百分百回購，依家嘅協議對投資者嚟講係好事。

余絲韻