本文重點
要數內地銀行最高職位嘅香港銀行家，相信非交行（03328）嘅葉迪奇（Dicky）莫屬。佢喺多年前從香港派駐內地做滙豐嘅中國區總裁，再借調去佢哋嘅策略合作夥伴交行負責零售銀行業務，「官拜」副行長一職，年過六十嘅佢依然精力充沛，滿腹大計發展零售銀行，絲絲問佢幾時退休，佢仲笑笑口話：「我都想呀！」
多得同事強迫操練
Dicky回想當初去到大陸，其實唔使點講普通話，因為滙豐入面好多唔同國籍嘅同事，多數都係講英文，不過去咗交行之後，同本土員工交流多咗，同事又特登同佢講普通話，所以短時間內「刨冬瓜」成績就突飛猛進。
佢相信依家嘅新一代講普通話會愈來愈好，好似佢個孫咁，入咗一間要講普通話嘅學校，有次學校老師打電話畀Dicky個女，一開口就講普通話，搞到佢個女差啲招架唔住，諗咗一陣至記得自己小朋友個名用普通話點樣講。
內地嘅消費金融概念起步都只係十年八年，相信以Dicky擁有咁豐富零售經驗嘅人才，喺咁大嘅市場入面應該大有作為。
余絲韻