讀英國文學及翻譯

馮孝忠管理手下投資、財資、資產管理及證券服務，運籌帷幄，但係咪以為佢以前讀數學或經濟，一直讀到上嚟呢個位，原來佢大學時係讀英國文學及翻譯，莎士比亞、拜倫及葉慈全部熟讀不在話下，畢業論文更加係《紅樓夢》，不過唔係研究情節，而係研究人名翻譯！

依家人名翻譯就易啦，通常都係將「煲冬瓜」拼音用英文字母寫番出嚟就得，不過文學作品每個名都有意義，好似「絳珠仙子」（林黛玉）同「神瑛侍者」（賈寶玉）咁，真係無咁上下功力都落唔到筆。馮孝忠依家喺另一個範疇大展拳腳，秒秒鐘點止幾百萬上落？

絲絲嘅結論係肯學最緊要，讀邊科等細路仔自己揀啦，最緊要讀得開心同投入，成功人士嘅例子「有辦你睇」。

余絲韻