本文重點
絲絲發覺香港啲電視台近年好興搞烹飪節目，唔係教你煮餸，而係要你睇吓一班唔識煮餸嘅靚女點樣倒瀉籮蟹，不過，琥珀能源（00090）總裁柴偉就話呢類節目喺內地一定無得做，皆因喺內地好難搵到唔識煮飯嘅女仔喎！
談琥珀投資大計
柴總話個節目係幾有趣，但喺內地就一定無得搞。佢話雖然內地依家好多男人都煮得一手好餸，但係識煮飯依然係內地女性嘅必備條件，所以呢類節目就算想移師喺內地搞，都會因為搵唔到唔識煮餸嘅女仔而搞唔到。不過，已婚嘅柴總最後好鬼馬咁講，話雖然內地女仔個個都識煮餸，但結咗婚之後煮唔煮就係另一回事囉喎！
柴總趁業績公布來港見吓投資者，佢話公司將投資最多三點三億元人仔，興建安吉一期天然氣發電廠，最快明年底前竣工；琥珀亦有意發展京興電廠二期，但實際仍需視乎內地電力需求，總投資額約六億元人仔。
余絲韻