本文重點
你估吓去年競選美國副總統落敗嘅佩林、美國前總統克林頓、南非大主教杜圖有乜嘢共通點呢？答案係佢哋三個都會嚟香港，喺里昂證券年度投資者論壇上發表演說，咁蹺都喺九月二十三日出場，當日肯定星光熠熠喇！今次會係佩林第一次走出美國發表佢首個亞洲演說，亦係佢第一次嚟香港。
講者來自不同領域
不過，呢三位人物好似同金融界無乜直接關係噃，里昂證券發言人惠勒話，就係專登要請金融界以外嘅名人做講者，例如講吓地緣政治，畀投資者擴闊吓眼界咁話。
講起上嚟又係喎，「末日博士」麥嘉華及「垃圾債券大王」米爾肯固然係論壇嘅常客，年前仲有美國前副總統戈爾、由歌手轉做宣揚反貧窮嘅活躍分子Bob Geldof等亦登上講台，艾頓莊、Macy Gray同埋Tom Jones等歐美歌手亦曾經嚟過里昂論壇娛賓添。
余絲韻