忠誠拍賣行拍賣部董事鄭世傑話，賣出嘅3個富雅花園銀主單位中，以金松閣中層A室個價搶得最高，以231萬元賣出，呎價3,736元，比開價198萬元高出16.7%。

環亞物業拍賣董事曾傑俊就話，尋日成功賣咗4個銀主盤，其中長洲桂濤花園連天台雙號單位以120萬元賣出，比開價足足高出36%。

信置4商場暑假報捷

暑假啱啱過咗，又係時候總結商場嘅表現，信和物業管理（商場推廣）總經理蘇蔡潔蓮同Vincent講，信置（00083）旗下包括奧海城、屯門黃金海岸商場、小西灣藍灣廣場同荃灣荃新天地四個大商場，今年一共用咗710萬元做暑期推廣，用咗咁多資源做宣傳，人流同生意額就梗係有升無跌。

佢話，四個商場喺七、八月嘅人流共有3,829萬，營業額就去到7.2億元，分別比舊年嘅暑假升咗19%同15%，表現認真唔錯。

（Vincent Lau）