大市愈炒愈牛皮，全無方向，港股進入業績期，業績好嘅有機會炒上，業績唔好者當然要捱沽。七月份唔少股仔炒到轟轟烈烈，八月份開始已無以為繼，近兩個禮拜唔少股仔開始玩高台跳水，計吓計吓，唔少計落跌幅有五成，如果高追無走到，真係幾傷。市傳內地收緊銀根，好多鑊鏟友都先行計數離場，睇怕短期股仔都幾難炒，明哲保身方為上策。
講番業績，去年贊助北京奧運嘅李寧（02331），於品牌宣傳上真係有唔錯嘅成效，前日公布一份出色中期業績，上半年多賺42%，股價更即時有反應。內地係運動強國，自然應有自身嘅民族品牌，李寧自可看高一線，尋日成交量絕對唔細，分明係班基金埋位掃貨，不妨買少少博彈上30元，止蝕可考慮放在20元。
古晨