幫食物銀行「集資」

傳統銀行撲水集資不外乎供股及發債，中信嘉銀幫食物銀行眾膳坊「集資」發起「食物募捐運動」，該行逾220名員工捐咗價值約3.3萬元嘅罐頭、即食麵、袋裝米、餅乾及食物現金券。

除咗捐食物，絲絲上周末仲見到20名中信嘉銀員工帶埋仔女參觀眾膳坊，一齊參加「愛心米包裝大行動」，將啲大包白米細分做3公斤重嘅細包裝，方便分配畀有需要人士。

呢個活動唔單止可以畀家長趁暑假同小朋友共享天倫，仲可教埋佢哋珍惜食物添。絲絲更認為經過多年慈善教育，食物銀行未來更可能會同傳統銀行平起平坐，因為前投資銀行家黃元山都曾經過檔到食物銀行打工（做義工）！

余絲韻