本文重點
中資證券行喺香港愈開愈多，勢力亦日益龐大，有見及此，中國企業協會旗下嘅證券行業委員會正籌備註冊成為獨立嘅法人組織，希望喺今年底前成事，最快可能喺「十‧一」前，喺證券行業組織中分一杯羹，增加影響力及市場知名度。
中資券商港勢力日增
中國企業協會旗下證券行業委員會已有二十多家中資券商會員，幾乎你噏得出嘅「中」字派大型證券行都榜上有名。證券行業委員會現任主席係中銀國際副執行總裁謝湧海，佢啱啱先至連任，可多做兩年。該會現任副主席陣容亦好強勁，包括有光大控股執行董事兼行政總裁陳爽及國泰君安（香港）執行總裁閻峰等。
中資券商近兩、三年喺香港市場佔有率大增，行內人士粗略估計起碼接近30%，佢哋成立獨立組織亦係好自然嘅事。尤其係近年本港嘅金融政策，好似同內地合資開諮詢公司、ETF跨境上市以至內地企業來港上市等，都離唔開中資券商嘅參與。證券委員會近年亦不時與政府、內地嘅監管機構溝通交流，去年更曾到台灣訪問，以及與港交所（00388）候任行政總裁李小加見面等，所以都係時候發圍啦！
余絲韻