本地魚缸開波已見腳軟，下半場被祖國魚缸抽後腿，恒指曾低見20,143點，幸而祖國魚缸散場前跌幅收窄，好友再發力挾淡倉，本地魚缸跌勢喘定，恒指跌少好多，報收20,435點，跌100點；國企指數則報收11,654點，跌48點或0.4%。本地魚缸一日玩升，一日玩跌，缸邊友愈覺難搵食，唔願再入場，成交縮水至只有565億元，買少見少。

缸邊友有缺水憂慮

A50中國基金（02823）報收13.7元，跌近3%，成交額高達33.2億元，係成交額龍虎榜冠軍，可見其他大隻佬交投幾淡靜。大笨象（00005）微跌0.3%至83.95元；祖國移動（00941）只微跌0.4%，報收78.7元。缸邊友擔心再無新資金流入，本地地主賣屋仔去貨速度亦見減慢，一旦錢莊閂水喉，日子更難捱，本地地主沽壓會較大，但昨日股價表現最曳的信置（00083），亦不過跌2.9%，相比累計升幅，可以話小巫見大巫。

祖國野獸（02628）派中期成績表，份業績都見得吓人，股價報收33.25元，升0.6%。中鋁（02600）日前派成績表，業績雖差強人意，但仍獲「高佬盛」跟「花旗邦」唱好，同建議「買入」。不過缸邊友睬你都傻，反正累計升幅唔嘢小，先行落車亦無錯，股價跌1.8%，報收9.04元。首創（02868）又炒「發A」，市場料回歸祖國魚缸在即，逆市升6.7%。

呢期國企分子炒業績，中鐵建（01186）明日派成績表，話唔定又會炒番轉。昨日中鐵建股價逆市微升0.1%至11.56元，此股在11.4元已獲得支持，較早前沽壓已消化得七七八八。據鐵道部副部長王誌國日前表示，已敲定未來3年鐵路建設投資計劃表，平均每年投資金額逾7,000億元人仔以上，祖國未來鐵路建設規模可望加速擴張，行業前景值得睇高一線。

夥拍中石油有錢途

此外，上周中石油（00857）跟中鐵建已在北京簽署合資合作框架協議。根據協議，中石油將為中鐵建在全國乃至海外重點工程建設提供穩定可靠的汽、柴油、瀝青、潤滑油等石化產品供應保障，中鐵建將以集採專供方式為中石油銷售業務提供穩定的市場，呢項協議料可締造雙贏局面。較早前，「高佬盛」曾出吹水報告，預期中鐵建在○九至一二年的盈利複合年增長達21%，目標價仲定到16.74元鬼咁高，較現價仍有超過四成上升空間。

古勝