本文重點
樓市氣氛向好，帶挈連天台嘅特色單位愈顯矜貴，利嘉閣周滿傑同Vincent講，七月市場共錄332宗連天台特色戶嘅成交，已係連續兩月錄得超過300宗有關成交個案，按月嘅成交量雖然略為減少，惟成交額就依然比對上個月升4%，合共總值10.73億元，創近一年多嘅新高。
市建局增賣樓參與度
佢仲話，成交量升得最勁嘅組別係價值1,000萬至2,000萬元嘅連天台單位，成交量同總值嘅按月升幅分別有75%及95%。另期內最賺錢嘅分層天台戶成交，係佐敦康源閣頂層連天台單位，以400萬元轉售，賺咗86.2萬元，賺幅有27%。
市場對發展商賣新盤嘅一舉一動高度關注，除咗關心單位嘅開價同銷情外，發展商有無守規矩賣樓都係熱門議題。Vincent八到，近年不斷有重建項目招標嘅市建局，為咗增加局方在有關重建項目嘅銷售參與度，決定日後招標重建項目時，會喺招標條款內寫明單位嘅銷售合約一定要獲該局簽署先可以作實，目的係希望透過增加參與度，更加有效監控轄下新盤單位嘅銷售秩序。
（Vincent Lau）