本文重點
社會愈來愈關注周遭物業發展嘅密度，令發展商申請重建時都會遇到不少阻力，Vincent八到，信和置業（00083）早前向城規會申請起精品酒店嘅中環士丹頓樓，諮詢期內接獲多達170份意見，當中大部分屬於區內居民嘅反對意見，擔心會重建1幢33層高嘅酒店，同附近一帶只係得四、五層高嘅舊樓好唔夾，仲憂心會加重地區嘅交通負荷。
士丹頓樓現時係樓高4層嘅舊樓，信置曾經申請起寫字樓，不過唔批，今次就改為申請精品酒店，估計可以有144個房間。另外，何文田新法書院嘅改劃土地用途申請會在周五由城規會審理，唔少區內居民都反對，擔心發展密度過高會影響交通等，而規劃署亦都唔支持該申請。
濠樓成交季增1.2倍
香港樓市今年價、量俱升，Vincent留意到一海之隔的澳門第二季成交量亦顯著攀升，據最新數據顯示，濠江於第二季已繳納印花稅嘅樓宇交易有3,713宗，成交總值45.7億元（澳門元‧下同），同比首季勁升1.2倍，其中二手成交佔2,277伙，總值37.6億元，按季分別大升1.8倍同2倍；期內新盤單位交易有1,103伙，佔整體單位總數29.7%，按季亦升1.4倍。至於第二季澳門住宅樓價亦上漲，平均每方米實用面積售價為18,928元，按季升10.6%。
（Vincent Lau）