本文重點
近排祖國魚缸好似食咗瀉藥，表現十分不濟，部分資金雄厚的內地投資者即時轉移陣地炒港股。有中資證券行友人透露，近兩個禮拜突然多咗好多內地豪客，當中甚至有兩個大客，一次過轉過億資金入帳戶，未知是否見A股短期難有起色，先將早前在內地的盈利調往海外投資。
港股大浪未急入市
聽證券業友人講，A股上半年升幅冠絕全球，內地賺錢容易，北水南調的情況雖然亦源源不絕，但金額未見驚人，之不過喺最近幾個星期，由於憂心政策風險，內地股市陷入調整，正所謂走得快好世界，自不免有投資者選擇先行獲利離場，而呢部分閒置資金，有不少係繞道來香港投資。
其實近排港股都風高浪急，在A股拖累下好難獨善其身，老友都認為內地客戶未必會急於入市，可能只係先將錢調出海外帳戶以備所需，不過動輒過億元的資金往來始終令人側目。
除了買股票外，內地客來港購物就更加豪氣，一向深受名店店員的喜愛。金占士有位朋友早前行入尖沙咀某間名店想試對鞋，講了5分鐘「唔該」都無人理，最後就嘗試用普通話說了一句「對不起」，即時有幾個靚女衝上來爭住為佢服務，令朋友暗嘆「港燦」的地位愈來愈低，真係唔夠內地客爭。
金占士