上星期五詩詩都覺得二三線股走勢轉弱，但見期指臨尾表現強勁，仲轉炒高水，以為尋日走得甩，結果上周五美股跌，尋日內地股市仲急挫，真係失晒預算。國美電器（00493）周五派成績表，詩詩打算呢隻持中線，繼續持有；至於濱海投資（08035）又唔似會死，加上成交勁縮，沽壓唔算大，等反彈再沽，或者隨時有注資。
廣深鐵路（00525）昨隨大市下跌，收報3.72元，跌0.11元，相對大市算跌得少，成交量只有325萬股，沽壓唔嚴重。雖然現價失守10日線，但仍穩守50日線之上，走勢唔算太差，反映此股有一定防守性。
內地刺激經濟措施成效逐步浮現，經貿運輸活動轉強，鐵道部公布七月份統計數據顯示，全國鐵路運輸經營狀況持續改善，其中貨運總發送量按年微增0.3%至2.85億噸，係今年首次錄得同比增長。估計未來幾個月，全國鐵路客貨運總發量將保持增長，廣深鐵料可受惠，料下半年業績續有提升。以現價計算，廣深鐵往績巿盈率接近19倍，周息率2.41%，可趁調整吸納，但宜持中線，唔多適合短炒。
詩詩