收市後恒指服務公司宣布，恒指維持42隻成分股，但國企指數添一隻，股神巴菲特愛股比亞迪（01211）入選。話雖如此，比亞迪環保車概念即使再好，睇見往績市盈率七十九倍，即使業績今年翻一番都仲係接近四十倍水平，貴到有啲買唔落手。

招行供股消息利好

招行（03968）A、H齊齊供股，集資150億至180億元以提高資本充足比率。自從招行以天價3.1倍市帳率，總額363億元買下永隆銀行後，市場一直等招行為永隆遺下大筆商譽作出撥備，並同時集資補充資本比率，選擇供股而唔以折讓價批畀大孖沙，對小股東相對比較有利，至少唔需要被攤薄，尋日股價在供股消息曝光後不跌反升乃好現象，招行的集資陰霾也得以消除，後市仲可以睇高一線。

儘管中國鋁業（02600）母公司入股澳洲必和必拓的交易，最終功敗垂成，但中國外匯儲備超過2萬億美元，正不斷試圖透過收購海外天然資源項目，分散外匯投資成為國策。兗州煤業（01171）以35.4億澳元入股澳洲煤商Felix Resources，邁出資源企業走出去的一大步。

兗煤看上的Felix，其煤礦基地主要集中在澳洲昆士蘭州及新南威爾士州，業務遍及勘探、生產、運營、發掘煤礦資源。資料顯示，○七及○八年盈利分別為4,700萬及1.88億澳元（約3.06億及12.3億港元）。

純以數字去睇，收購市盈率18.8倍，較兗煤本身8.3倍高出一截，減去資金成本之後對業績的即時幫助唔大，但天然資源收購，其實睇往績意義唔大，最重要係地殼底下，尚未開發礦產到底規模有多大。

收購充實資源儲備

市場消息指Felix攤佔旗下煤礦儲備高達13億至14億噸，如果數字偏差唔大，那收購對兗煤幫助好大，幾乎等同本身煤儲量四分之三。

今年內地煤價無好似想像般插水，合約煤價只係由高位回落近一成，第二季經濟開始復甦，煤商大條道理企硬唔減，電煤需求持續加上煤商保持產能提升，今明兩年煤股業績應該表現唔錯，預期市盈率13.8倍，兗煤仲算合理。或許收購價值未完全顯露的Felix，兗煤抽升後，短期大行計過數會擔心業績及股價會回吐，到時係理想入市時機。

戴峰修