定息存款改用港元

其實呢間保險公司做開嘅都係美元保證定息計劃，仲推咗兩輪咁多，可見反應係非常熱烈，而且呢個計劃畀嘅息口起碼有成三厘幾，喺呢個零息年代，回報都算相當吸引。之不過美元嘅國際地位自金融海嘯爆發後一直麻麻，好似各國政府都話想揸少啲美元資產，而香港呢邊又周不時有話沿用多年嘅聯繫匯率即將取消，將港元同美元脫鈎，搞到連一班資深嘅專業投資者都高呼美元怕怕，要將美元保單轉番做港元。

再加上呢間保險公司之前風雨多多，依家難得新計劃反應咁好，當然要保住班客仔，而且仲要保住個勢頭，收宣傳之效，所以最新都推出埋港元計劃，務求攬實班米飯班主唔放！

余絲韻